4 ka mga foreigners kag isa ka Filipina, ginpasakaan sang kaso nga syndicated estafa sang NBI 6

Iloilo City — Ginpasaka na sa City Prosecutor’s Office ang kaso nga syndicated estafa batuk sa 4 ka mga foreigners.

Ginpasakaan sang kaso sanday Francis Onyebuchi Amadi, Nigerian national kag naga-istar sa Bacoor, Cavite City; Sitti Faridah Binti Abdul Amid kag Ishamah Binti Sheck Dawood, lunsay mga  Malaysian nationals kag Chukwudi Ugwu, Nigerian national, estudyante kag naga-istar sa Dasmariñas, Cavite. Ginsugo ni Stephen Desmond Nelson, nagpakilala nga German national ang 4 ka mga foreigners nga magkadtu sa syudad agud magkuha sang minilyon ka pesos nga kuwarta sa asawa sang napatay nga British national nga si alyas Mercy sang Guimaras.

Si alyas Mercy ang na-engganyo ni Nelson nga mag-invest sa oil business sa Malaysia kag ginpangayuan sang 500 million pesos nga investment.

Nagduda na si Mercy bangud masobra na sa 22 milyones pesos ang ginpadala niya kay Nelson sa Malaysia, wala gihapon masaylo sa iya accounts kabangdanan gindangup sini ang problema sa National Bureau of Investigation ukon NBI 6.

Sang wala na nagpasugot ang money transfer corporation nga makapadala pa sang kuwarta si Mercy sa Malaysian, naghambal si Nelson nga mapadala siya sang tawo sa Iloilo City agud magkuha sang kuwarta.

Gilayon nga gin-conduct ang entrapment operation sang Pebrero 23 sa isa ka mall sa syudad sa diin nadakpan nadakpan sanday Amadi, Amid kag Dawood nga nagabaton sang 3 milyones pesos halin kay Mercy.

Pebrero 24, nadakpan man sa entrapment operation si Ugwu nga nagbaton sang 3 milyones pesos.

Una na nga nadakpan sa entrapment operation sang Pebrero 21 ang Pinay nga asawa ni Amadi nga si Rosalyn Ibarra nga nagabaton sang 2 ka milyon ka pesos halin kay Mercy.  (JoMaque)