SABAT SANG CORONACION CHIVA “WALING-WALING” COMMAND SA ENCOUNTER SA LEON
MADRAMA NGA ENGKWENTRO SANG AFP KAG CAFGU, NAGDULOT SANG DAKU NGA PERWISYO SA MGA SIBILYAN
Indi matuod nga NPA ang nakaengkwentro sang mga Cafgu sa Brgy Lampaya, Leon, Iloilo sining aga sang Hunyo 20, 2017. Sandig sa pag-usisa sa mga yunit sang NPA nga nagahulag sa erya ng Leon kag Alimodian, ginapanginwala nila nga may mga Kaupod sa Brgy Lampaya para atakehon ang mga Cafgu sang panahon nga ini bangud nahibal-an sang mga Kaupod nga may presensya sang madamo nga tropa sang AFP diri. Kon matuod nga may NPA sa lugar, ang mga pasista nga tropa sang 61st IB na ang ginbira nila sangsa mga Cafgu nga nakaposisyon sa komunidad, kag delikado nga maiguan ang mga sibilyan.
Para sa NPA-Panay duha ang posible nga ugat sang hitabo nga ini: una, mis-encounter ini sang naga-operasyon nga tropa sang 61st IB kag sang mga katapu sang paramilitar/Cafgu sa Lampaya nga indi nila maayo nga nakoordina. Bangud ugali na sang 61st IB nga indi mag-ako sang kapalpakan sa publiko, ginpadayon na ang palabas nga engkwentro. Pangaduha, hungod nga ginhimo ang eksena nga ini para hatagan sang rason ang pagmilitarisa sa mga barangay nga ila ginadudahan nga direksyon sang NPA nga nag-reyd sa Maasin PNP. Labaw sa tanan, indi mahimo nga himuon sang NPA ang amo sini nga kaladlawan nga pamaagi sang “atake”
Kami nagasimpatiya sa mga sibilyan nga labi nga naapektuhan sang katontohan nga ini sang 61st IB. Base sa report sang mga taga-media nga nag-cover sang hitabo, madamo nga pumuluyo labi na ang mga kababaihan kag kabataan ang napilitan nga magbakwit bangud sa sobra nga kahadlok. Wala sila naka-igma kag napilitan nga untaton ang klase sang mga estudyante sa mga kalapit nga barangay kag bisan sa bilog nga banwa sang Alimodian, Iloilo.
Ginaalerto namon ang mga masa sa erya nga ginaatake subong sang 61st IB – 3rd ID. Bantug ang tropa nga ini sa pagpaniro sang mga sibilyan nga ila ginadudahan. Tubtob subong nagasinggit pa sang hustisya ang mga pamilya nanday Lorendo Borres kag Ian Borres nga ginpatay sang ila nag-operasyon nga tropa sadtong Pebrero 24, 2017 sa Brgy Jebaca, Maayon, Capiz. Tigaylo nga silutan ang mga nakasala nga tropa, wala sang huya nga ginpatu-patuan pa sang mga opisyal sang 61st IB kag 3rd IDPA nga NPA ang mga biktima sa pihak sang pagpamatuod sang pamilya, mga kaparyentehan, kakilala kag lokal nga opisyal nga ordinaryo nga mga mangunguma ang duha nga napatay. Kag mas masakit pa, na-promote pa sa mas mataas nga pusisyon ang kumander sang berdugo nga batalyon, si Col. Leonardo Peña, bilang pangaduha nga kumander sang 301st Brigade, PA nga nakabase sa Dingle, Iloilo.
Ginahangkat namon ang 61st IB na magtindog sa kamatuoran sa pag-ako sang ila kasaypanan kag sabton ang huol kag galastuhan sang pamilya labi na nga yara sa kritikal nga kondisyon subong ang ila naiguan nga katapo sang Cafgu.
Ka Julio Montana
Tagapamaba
Coronacion “Waling-waling” Chiva Command
NPA-Panay Region