Mayor Joe Espinosa, mapaguwa sang Executive Order kon diin makabaligya sang mga palupok antes ang New Year celebration

Iloilo City–Natalana nga magpaguwa sang Executive Order si Mayor Joe Espinosa sa mga lugar nga mahimo baligyaan sang mga palupok para sa New Year celebration.

Suno kay City Administrator Hernando Galvez, posible nga basehan sang alkalde ang rekomendasyon ni City Fire Marshal Bartolome Biliran. Sa ginforward nga rekomendasyon ni Biliran, ginsuhestyun sini nga baligyaan sang mga palupok ang circumferential road sa San Jose, Arevalo kag circumferential road sa Buhang, Jaro agud malayo sa mga pamalay kag masiguro nga safe ang mga nagabakal kag vendors.

Ang mga negosyante lang nga nakakumpleto sang mga requirements pareho sang clearance halin sa Bureau of Fire Protection ang tugtan nga magbaligya sang palupok. Sa record sang BFP Iloilo City, pito pa lang ang nahatagan sang Fire Safety Inspection Certificate. (AGB)