Mga konsehal, nagpaathag sa indi nila pagsuporta sa resolution ni Councilor Joshua Alim nga nagahingyo sa DPWH nga i-demolish ang mga kiosko sa guwa sang Jaro plaza

Iloilo City — Nagpa-athag ang mga konsehal kon ngaa wala sila nagsuporta sa resolution ni Councilor Joshua Alim nga ginpresentar ni Councilor Plaridel Nava  sa session. Ang resolution nagarequest sa DPWH City District Engineering Office nga ipatuman ang ila mandate nga gub-on ang obstruction sa national road paagi sa pagdemolish sang mga kiosko sa guwa sang Jaro Plaza.

Suno kay Councilor Ed Peñaredondo, wala nagagutok ang mga salakyan sa guwa sang Jaro Plaza. Nagapati si Peñaredondo upod kay Councilor Candice Tupas nga may poder si Mayor Joe Espinosa base sa Local Government Code sa pag-isyu sang Executive Order Number 2 series of 2018 nga nagapahanugot sa pagpahamtang sang mga kiosko angut sa Jaro Agro-Industrial and Charity Fair.

Ginpahayag naman ni Councilor Ely Estante nga nakadepende sa DPWH kon idemolish ang mga kiosko. May komunikasyon naman suno sa iya si Engr. Rodney Gustilo kag Mayor Espinosa gani dapat nila nga respetuhon.

Ginpahayag ni Councilor Jay Treñas nga indi man sini luyag nga nahamtang sa guwa sang Jaro Plaza ang mga kiosko apang gusto niya mahibaluan kon ano ang legal basis sa lihuk. Suno kay Councilor Lizl Salazar, wala siya sang nauyatan nga legal basis samtang suno kay Councilor Love Baronda, dapat irefer sa proper committee ang isyu. Naghipos lang ang kalabanan sa mga konsehal pagkatapos sang presentasyon ni Nava samtang sanday Councilors Peñaredondo kag Estante lang ang nagtindog agud magpa-athag sang ila opinion. (JoMaque)