(UPDATE) Site Task Group, gin-activate sang Iloilo City Police Office sa pag-abot ni Presidente Rodrigo Duterte sa Iloilo buwas

Iloilo City–Gin-activate sang Iloilo City Police Office ang Site Task Group para sa pag-abot ni Presidente Rodrigo Duterte buwas.

Suno kay ICPO Spokesperson PSI Shella Mae Sangrines, si ICPO Director PSSUPT Henry Biñas ang Task Group Commander kag magapanguna sa seguridad sang presidente sa pagtambong sini sa national convention sang Philippine Councilors League sa Iloilo Convention Center.

Bilang kabahin sang security measures, ginpahibalo ni Sangrines nga temporaryo nga siraduhan sugod alas-6 sa aga ang Iloilo Business Park sa Mandurriao tubtub nga makabiya ang presidente.

Dumilian nga makasulod ang mga salakyan kag himuon nga one entry kag one exit ang lugar.

Una nga madiretso sa Cabatuan si Duterte pag-abot sini sa Iloilo Airport alas-3 buwas sa hapon agud magtambong sa pagpanagtag sang Certificate of Land Ownership Awards sang Department of Agrarian Reform. (AGB)