Bana nga wala gindala sa picture nga ginhimo wallpaper sa cellphone sang iya asawa, naghikog

Iloilo—  Patay na sang nasapwan sang iya asawa ang 31-anyos nga lalaki sa balayan sang ila kusina pasado las singko kahapon sang kaagahon, Marso 11, sa Barangay Cagamutan Sur, Leganes.

Naghikog ang bana, nga tumandok sang Calinog, gamit ang paha.

Ang mag-asawa nagatrabaho bilang stay-in worker sa duta nga ginapanag-iyahan sang seaman sa Leganes kag nagabaligya man sang uling kag amakan.

May anak ang mag-asawa nga naga-edad pa lang sang 10 ka bulan.

Suno kay PO3 Leo Barnuevo sang Leganes Police Station, wala man sang gin-awayan ang mag-asawa antes naghikog ang bana pero kagab-i, naghambal ang bana sa asawa nga “indi siya pagbayaan.”

Posible suno sa pulis nga nagsunggod ang bana sang nakita nga picture lang sang asawa kag ila bata ang ginhimo nga wallpaper sa cellphone sang iya asawa (not profile picture sang asawa sa Facebook as earlier reported).

Ginapatihan man nga may mas madalum pa gid nga rason sa paghikog sang bana.

Ang paghikog sang bana sa Leganes natabu isa ka adlaw matapos man nagpanginmatay ang 13-anyos nga sulterito sa Cabatuan bangud gin-akigan sang iya amay. (JoMaque)