Manhunt operation sa mga ex-convicts nga wala makahingaw surrender sa deadline ni PDuterte, gin-untat –PRO 6 spox

By: Aine Grace Bravo | September 20, 2019

via Aljohn Torreta

Camp Delgado, Iloilo City — Gin-untat sang Police Regional Office 6 ang manhunt operation sa mga ex-convicts nga napaslawan sa pag-surrender tubtob kahapon nga deadline ni Presidente Rodrigo Duterte para sa mga ex-convicts nga nag-avail sang good conduct time allowance.

Ginkumpirmar ni PRO 6 spokesperson PLTCOL Joem Malong nga nakabaton sila sang memorandum halin sa Directorate for Operations sang PNP Central Office nga suspendido ang manhunt operations bangud gina-finalize pa ang listahan sang kinahanglan magpa-account halin sa Bureau of Corrections.

Una na nga may ginhatag nga listahan ang BuCor sa PNP, apang may natukiban nga may mga sala sa kaundan.

Gin-athag ni Malong nga bisan gin-untat ang manhunt operation, ginpabaskog naman sang mga pulis ang pag-monitor sa mga ex-convicts nga wala nag-surrender.

Sa data sang PRO 6 tubtob las-11:59 kagab-i, Setyembre 19, 68 ka mga ex-convicts sa rehiyon ang nagsurrender; 34 sa amo nga numero ang gindala na sa Sablayan Prison and Penal Farm sa Occidental Mindoro.

Dal-un man sa Sablayan ang dugang nga 31 ka mga ex-convicts.