3 Ilonggos nga lakip sa gindala sa Sablayan Prison and Penal Farm matapos nag-surrender bangud sa GCTA controversy, nakapauli na

By: JoMaque | Disyembre 29, 2019, 8:37am

Iloilo – Magasug-alaw sang bag-ong tuig upod sa iya pamilya ang Ilonggo nga nag-surrender sang ginmandu ni Presidente Rodrigo Duterte ang pag-surrender sang mga nahilway paagi sa good conduct time allowance (GCTA).

Nag-abot sa Leganes si Ramil Heso halin sa Sablayan Prison and Penal Farm la-1:30 kaina sang hapon. Kaupod ni Heso nga nagbiyahe halin sa Occidental Mindoro sanday Antonio Tacuyan sang Tubungan kag Joselito Oreca sang Cabatuan.

Nagpasalamat si Heso nga naka-upod niya liwat ang iya pamilya. Magabalik sa pagpanguma si Heso.

Nagalaum man ang iban nga taga-Iloilo nga gindala sa Sablayan matapos gin-review ang ila record nga makapauli na sila kag makaupod liwat ang ila pamilya.

Nauna na nga nakapauli sanday Narciso Idio sang Dueñas kag Vicencio Somcio sang Sta. Barbara nga lunsay mga parolees. Nakapauli naman ang duha nga ka taga-Ajuy kag duha nga ka taga-Iloilo City.

21 tanan ka taga-Iloilo ang gindala sa Sablayan, kag siyam na sa ila ang nakapauli.