Mga napatay sa Western Visayas sa paglaslas sang bagyo Ursula, nagsaka sa 26 – RDRRMC 6

By: JoMaque | Disyembre 30, 2019, 9:35am

Iloilo City (UPDATE) — Nagsaka sa 26 ang gin-report napatay sa Western Visayas sa paglaslas sang Bagyo Ursula suno sa Regional Disaster Risk Reduction and Management Council 6 as of December 29.

Suno sa RDRRMC 6, 16 ang napatay sa Iloilo kag tag lima sa Aklan kag Capiz.

Sa Iloilo, walo ang napatay sa Batad lakip ang amay nga si Roel De Asis lakip ang iya tatlo ka mga kabataan.

Pinaka-ulihi nga na-retrieve ang bangkay sang 10-anyos nga si Roel De Asis Jr alyas Moymoy.

Apat naman ang napatay sa Balasan, duha sa Carles samtang tag isa sa Passi City kag Estancia apang gina-verify pa.

Na-record man ang casualties sa Capiz sa Mambusao, President Roxas kag Pontevedra samtang tatlo ang gin-report napatay sa Ibajay samtang tag isa sa Batan kag New Washington sa Aklan.

Walo naman ang gin-report missing. Tatlo sa amo nga numero ang na-monitor sa Carles samtang isa sa Passi City.

Missing man ang crew sang motor banca sa Malay, Aklan kag duha ka mga lalaki sa Pontevedra, Capiz.

25 ang napilasan sa rehiyon sa paglaslas sang Bagyo Ursula.