Pagpa-untat sang biyahe sang Ceres buses sa Iloilo province, desisyon sang inter-agency task force –LTFRB 6 Director

By: JoMaque | Marso 26, 2020

ILOILO – Desisyon sang Inter-Agency Task Force on COVID-19, kag indi sang LTFRB, ang pagpa-untat sa biyahe sang Ceres buses sa probinsya sang Iloilo.

Ini ang paathag ni LTFRB 6 Director Richard Osmeña sa gulpi nga pag-untat sang biyahe sang mga Ceres buses sang Marso 24.

Suno kay Osmeña, nagapanguna nga tuyo sang tikang nga ma-untat ang paguwa sang mga tawo sa ila balay, agud mangin epektibu ang Enhanced Community Quarantine nga ginapatuman. Kasunod man ini sang obserbasyon nga mabudlay ang pag-practice sang self-distancing.

Nakahanda si Osmeña nga magpungko upod sa Provincial Government kag mga municipal officials agud istoryahan ang win-win solution sa problema sang mga wala sang masakyan sa ila transaksyon.