Ikaduha nga COVID-19 patient sa Iloilo City, napatay; City Health Office, nagahimo na sang contact tracing

By: JoMaque, Marso 28, 2020

Iloilo City — Ginkumpirmar ni Mayor Jerry Treñas nga may duha na ka positibo nga kaso sang COVID-19 sa syudad.

Napatay suno sa alkalde ang ikaduha nga pasyente, gani gilayon naghimo sang contact tracing ang City Health Office agud ma-isolate ang mga naka-contact sa napatay nga pasyente.

Ginrekomendar man ang pagkuha sang swab sample para ma-test sa COVID-19 ang mga miembro sang pamilya sang pasyente, ilabe na ang mga kaupod niya sa balay.

Na-disinfect naman ang lugar sang napatay, suno kay Mayor Treñas.

“RECORD SANG DOH 6”

Base sa record sang Department of Health Center for Health Development 6, ang napatay amo si WV Patient # 11.

Suno kay Dr. Mary Jane Juanico, head sang Infectious Diseases Section sang DOH 6, may travel history sa Manila ang pasyente.

Ginhilanat kag gin-ubo siya kag napatay sang Marso 19 bangud sa COVID-19, Acute Respiratory Distress Syndrome (ARDS), Community Acquired Pneumonia-High Risk.

Nagabatyag na ang pasyente sang nagpa-admit sa ospital kag ginkabig siya nga COVID-19 patient suno kay Dr. Juanico gani nga nakahimo sang precautionary measures ang mga health workers nga nagtatap sa iya.

Ang una nga kaso sang COVID-19 sa Iloilo City amo si WV # 3, 61-anyos nga babaye halin sa Mandurriao. Stable na sa ospital ang pasyente, suno sa DOH.