DOH 6, nagtadlong nga indi PUMs, ang tanan nga taga-Guimbal

By: JoMaque | Abril 2, 2020

Iloilo — Nagpaguwa sang advisory ang Department of Health Western Visayas Center for Health Development 6 nga nagapahayag nga indi tanan nga residente sang Guimbal ang persons under monitoring sa COVID-19.

Gintadlong ni DOH 6 Director Marlyn Convocar ang ila una nga statement sang Marso 31 nga PUMs ang tanan nga taga-Guimbal bangud sa tatlo ka COVID-19 cases, lakip ang isa ka napatay, kag isa ka local transmission.

Suno kay Convocar, ipatuman lang ang istrikto nga quarantine sa tanan nga residente.

Gina-advise man ang pagpabaskog sang home quarantine sa duha ka barangay sa diin naga-istar ang mga confirmed cases, kag ginsulit ang pagpabakud sang social distancing kag monitoring sa iban nga barangay.

Una na ginpabutyag ni Guimbal Mayor Oscar Garin nga indi sila nagpatuman sang lockdown bangud indi masarangan sang gobyerno nga mapakaun ang tanan nga residente kun dumilian sila sa paguwa sa ila balay.

Ginpasiguro man ni Garin istrikto nga ginapatuman ang Enhanced Community Quarantine sa banwa.