Pila ka Ilonggo Seafarers sa Manila, nagpositibo sa COVID-19 –Gov. Defensor Jr.

By: JoMaque | Abril 17, 2020

Iloilo City — Ginbuyagyag ni Iloilo Gov. Arthur Defensor, Jr. nga may mga Ilonggo seafarers sa Manila nga nagpositibo sa coronavirus disease.

Pero wala naghatag sang dugang nga mga detalye ang gobernador sa mga infected seafarers.

Gin-athag ni Defensor nga luyag niya gid makapauli sa ila pamilya ang mga OFWs, “but allowing them to come home at this time only increases the risk of more Covid-19 cases. The safety of their families will be put at risk, and this will further extend the deadline of our enhanced community quarantine.”

Gin-ako ni Defensor nga ang mga seafarers, kabahin sang batch sang mga OFWs nga mapauli kuntani sa Iloilo sang Abril 14 pero gin-abort ang ila flight bangud ginpamatukan sang gobernador kag sang mga mayors sa Iloilo.

Ginproponer ni Defensor kag sang League of the Municipalities of the Philippines Iloilo Chapter nga ipa-idalum sa COVID-19 test ang mga returning OFWs antes pahanugutan nga makapauli sa Iloilo.

Gin-adoptar naman sang Western Visayas Regional Task Force (RTF) Covid-19 ang proposal.

Sa resolution sang Western Visayas RTF sang Abril 13, gin-require ang mga OFWs nga magsumiter sang ila COVID-19 test results halin sa ila country of origin kun may ara. Gin-require man sila nga magpa-idalum sa COVID-19 test antes magpauli sa ila lugar.

Ang test lang nga gin-aprubahan sang Department of Health ang batunon nga valid results, suno sa RTF.

Ang mga OFWs, gina-require nga magpa-idalum sa 14-day quarantine kag dapat asymptomatic antes maghalin sa ila lugar sa diin sila na-stranded.

Gin-ako ni Defensor nga nasopresa siya sang nabaton ang impormasyon nga mapauli sa Iloilo ang 100 ka OFWs pagkatapos sang Holy Week.

Ang Overseas Workers Welfare Administration (OWWA) ang nag-facilitate sang amo nga mercy flight para sa mga OFWs pero wala nadayon.