Mga naga-edad 60-anyos pataas kag 20-anyos panubo sa Iloilo province, indi makaguwa sa ila balay samtang wala pa ginapasugtan sang IATF; Iloilo City Mayor Treñas, ma-apelar naman sa IATF nga pasugtan na nga makaguwa ang amo nga sektor

By: JoMaque | June 17, 2020

Iloilo – Indi pa makapaguwa sang executive order si Iloilo Governor Arthur Defensor Jr, nga nagapaidalom sa Modified General Community Quarantine (MGCQ) sa probinsiya sang Iloilo.

Ang ginapatuman subong sa probinsiya amo ang interim EO kahapon nga naga-extend sang EO 128 sang gobernador sang una nga ginpaidalom ang probinsiya sa MGCQ sang Mayo 30.

Suno kay Defensor, nagahulat pa siya sang guidelines nga idugang sang National Inter-Agency Task Force sa mga lugar nga ginpaidalom sa MGCQ.

Isa na diri suno sa iya ang pagguwa sang mga naga-edad sang 60-anyos pataas kag 20-anyos panubo. Samtang wala pa suno sa gobernador sang bag-o nga guidelines, magapabilin nga indi sila makaguwa sa ila balay.

Samtang, maga-apelar si Iloilo City Mayor Jerry Treñas sa National IATF nga pasugtan na makaguwa ang mga senior citizens para sa ila mental health.

Kinahanglan nila suno sa alkalde nga makaguwa bangud pila ka bulan sila nga naka-quarantine.

Dapat naman nga magguwa ang mga naga-edad sang 20-anyos panubo ilabe na nga ginaduso sang DepEd ang pagbukas sang klase sa Agosto.

Gin-athag naman sang alkalde nga samtang wala pa sang sabat ang IATF sa iya apelasyon, ginapasugtan lang nga magguwa ang mga senior citizens kun mag-exercise, magkadto sa mga essential establishments ukon mamalaklon sang essential needs.| Via Firingline