2 patay, 1 pilason sa shooting incident sa Ajuy

By: JoMaque | August 2, 2020

Iloilo — Patay ang magpakaisa kag pilason ang ila pakaisa sang natiruhan sa Sitio Nabitasan, Brgy. Tipacla, Ajuy.

Suno kay Police Captain Roy Castro, hepe sang Ajuy Municipal Police Station, pasado las 12 sang tungang gab-i natabu ang insidente.

Ginkilala ang mga napatay kanday Rolly Herida, 45-anyos kag Alberto Herida 43-anyos samtang pilason si Primitivo Herida, 65-anyos lunsay mga residente sang amo man nga barangay.

Sa imbestigasyon sang Ajuy police, antes natabo ang insidente upod nga nag inum-inum sa tyangge ang suspek nga si Romeo Balino Jr. 37-anyos kag tatlo ka biktima.

Ginpahayag sang pulis nga nagbaisay ang suspek kag ang mga biktima kag nagbunot sang pusil ang suspek rasun nga luyag kuntani dis-armahan sang mga biktima. Ginsaway sila sang tag-iya sang tyangge kag ginkuha ang pusil kag gintago.

Nagpauli na ang mga biktima apang nagpabilin si Balino sa tyangge agud kuhaon ang pusil.

Sang nakuha na ang pusil, ginkadtoan sang suspek ang mga biktima kag nagpangtiro.

Gindala sa ospital sanday Rolly nga may duha ka pilas sa likod kag Alberto nga may pilas sa ulo, abaga, kag puwak pero gin-deklarar nga napatay.

Napilasan naman sa ilong si Premitivo nga out-patient na sa ospital.

Gilayon nga nagpalagyo ang suspek kag padayon nga ginapangita sang mga pulis.

Narecover ang anum ka fired cartridges case sang 45 caliber kag isa ka live ammunition sang 45 caliber. | via Aksyon Farrah Mae Morano