Former Iloilo City Mayor Jed Patrick Mabilog, lakip sa ginmitlang ni Pres. Duterte nga mga pangalan sang mga gov’t officials nga na-dismiss ‘with finality’ subong nga tuig
ILOILO CITY – Nalakip sa nalawagan ni Presidente Rodrigo Duterte si former Iloilo City Mayor Jed Patrick Mabilog sa mga pangalan sang government officials nga gin-dismiss “with finality” subong nga tuig.
Gin-isa-isa lawag sang presidente sa iya Address to the Nation subong nga gab-i, Nobyembre 30, ang mga pangalan.
“Meron ditong mga pangalan na nagka-kaso pero nadesisyunan ngayon lang. Naabutan na sila ng panahon, na-dismiss mga ito with finality ngayong taon,” suno kay Duterte.
Si Mabilog, suno sa presidente, ang gin-dismiss sa kaso nga grave misconduct, serious dishonesty kag conduct prejudicial to the best interest of the service.
BACKGROUND
Agosto 31, 2017 sang nagbiya si Mabilog sa Pilipinas agud magtambung sa international summit, pero nag-file siya sang sick leave kag wala na nagbalik sa pungsod. Si Mabilog ang nalakip sa narco list nga una ginlawag ni Presidente Duterte.
Oktubre 30, 2017 sang ginserbe sang Department of Interior and Local Government 6 ang dismissal order sang Ombudsman kay Mabilog, paagi sa iya sadto abogado nga si Atty. Joenar Pueblo, sa kaso nga serious dishonesty bangud sang wala napa-athag nga paghabok sang iya manggad sa iya 2013 Statement of Assets, Liabilities and Net Worth.
Nag-file ang kampo ni Mabilog sang petisyon sa Court of Appeals agud baliskaron ang desisyon sang Ombudsman, pero ginbasura sang CA sang Nobyembre 2017. Mayo 17, 2019 sang gin-uphold sang CA with finality ang dismissal kay Mabilog.
Enero 3, 2018 naman sang gin-report sang Ombudsman ang pag-isyu sang isa pa ka dismissal order batok kay Mabilog bangud sa ma-anomaliya nga towing services deal nga ginsudlan sang 2015 sang kompaniya nga gin-alegar iya ginapanag-iyahan. Sa desisyon nga ginpirmahan ni Ombudsman Conchita Carpio-Morales, napamatud-an nga guilty si Mabilog sa administrative offenses nga grave misconduct, serious dishonesty kag conduct prejudicial to the best interest of the service.
