‘Pangamuyo lang sa mahal nga Diyos. Basta buhi, may pag-asa pa’ –Ruben Beso, isa sa 3 mangingisda nga taga-Antique nga na-rescue sa Tawi-Tawi matapos ang 17 ka adlaw nga pagpa-utaw-utaw sa lawod
By: Aine Grace Bravo | January 27, 2021
Aksyon Radyo Iloilo
ANTIQUE – “Pangamuyo lang sa mahal nga Diyos. Basta buhi, may pag-asa pa.”
Ini ang pahayag ni Ruben Beso, 51-anyos, nga isa sa tatlo ka mangingisda nga na-rescue sa Tawi-Tawo makaligad ang 17 ka adlaw nga pagpa-utaw-utaw sa lawod.
Nakapauli na kahapon sa Barangay Sagua, Anini-y, Antique si Beso, upod sa iya bata nga si John Lauren, 27-anyos, kag John Javellana, 34-anyos.
Enero 3 sang nagpangisda sa Cuyo, Palawan ang tatlo. Suno kay Beso, mano-mano ang ila pagpamunit kag madamo na sang kuha sang nasagairan sang daku nga barko ang ila sakayan sang Enero 6 sang kaagahon.
Nasagairan sang barko ang tarik gani nabali ang tarik kag nagkapan ang sakayan, suno kay Beso. May suga man ang sakayan nanday Beso, pero posible suno sa iya nga wala sila nakita sang mga sakay sang barko.
Nagtalabog ang mga hulik nanday Beso kag bisan ang ila mga gamit sa pagpamunit kag ang ila cellphone.
May naglabay man nga isa pa ka barko, pero posible wala man sila nakita bangud nagdiretso lang.
Enero 8, suno kay Beso, may naglabay nga isa ka barko. Mga 200 ka metro lang ang kalayuon sang sakayan nanday Beso gani nakita niya nga may duha ka tawo sa barko nga nagateleskopyo sa ila, pero nagdiretso man ang amo nga barko.
“Sobra ka tugnaw,” suno kay Beso, kag dalagku pa ang balod apang wala gid sila nadulaan sang paglaum.
Sa 17 ka adlaw nga pagpa-utaw-utaw, ang makuha nga kalampaw lang ang ginakaun nanday Beso. May tiun nga may lubi nga nagalutaw sila nga nakita kag, “nakasapin-sapin” man ini sa gutom sang tatlo.
Tubig dagat naman ang ginadimdim nila. Nagpasalamat lang si Beso nga nag-ulan gani nakasalud sila sang tubig nga amo ang nagsustiner sa ila.
Enero 23 sang nakalab-ut sa Tawi-Tawi ang sakayan nanday Beso. Ginbuligan sila sang mga mangingisda, gindala sa mainland kag ginpakaun. Nagpangayo man sang bulig si Beso agud ma-contact sa Facebook ang iya bata kag mapahibalo nga nakaluwas sila.
Gindala sanday Beso sa balay sang mayor sang Languyan, Tawi-Tawi kag ginpatawgan sa Coast Guard agud ma-facilitate ang ila pagpauli.
Kahapon, Enero 26, nagdungka sa Iloilo City ang barko sang Coast Guard nga ginsakyan sang tatlo ka mangingisda. La-una kahapon sang hapon, nakapauli na sila sa ila barangay sa Anini-ay, Antique.
Sa subong, nagapahuway-huway si Beso. Pero kun may mahatag sa iya sang sakayan, magabalik gihapon siya sa pagpanagat.
“Wala ta mahimo kay amo na ang palangabuhian ta,” suno pa kay Beso. –via Aksyon Hotline