Pinakamataas nga pusta sa bulang sa Iloilo Coliseum, na-record kahapon, Pebrero 2
Iloilo City — Na-record ang pinakamataas nga pusta sa bulang sa Iloilo Coliseum kahapon, Pebrero 2, kadungan sa fiesta sang Jaro.
Suno kay Mr. Luis Tinsay, presidente kag general manager sang Iloilo Coliseum, may nagpusta sang P15-Million pesos sa isa ka manok apang wala ini nakasaran sang ila kontra.
Napierda ang manok nga ginpustahan sang P15-Million.Wala sang impormasyon si Tinsay kun pila ang ginpusta sang kasumpong.
Kadungan sa fiesta sa Jaro kahapon, Pebrero 2, 54 ka sultada ang nahiwat sa Iloilo Coliseum.Mahimo maakomodar sang tubtob 6,000 indibidwal ang coliseum apang bangud sang COVID-19, ginlimitahan lang ini.
Wala sang ‘turn-out’ suno kay Tinsay bangud wala sila nagpagawad para makasulod sa coliseum ang publiko.
Ang mga tag-iya sang manok, ila financiers lang, kag personnel sang coliseum ang ginpahanugutan nga makasulod.
May tag 1 tubtob 10 ka financiers ang kada tag-iya sang manok.Nagdepensa naman si Tinsay nga makabig tag-iya gihapon sang mga manok ang mga financiers rason ginpahanugutan nga makasulod.
Base sa DILG Memorandum Circular Number 2020-140, ginadumilian ang live audience, remote ukon online betting, kag live broadcasting/telecasting sang bulang.
Nagpasigurado naman si Tinsay nga lunsay may face masks kag face shields ang tanan kag istrikto man nga gina-observe ang physical distancing.
