Northern Iloilo, ginatutukan bangud sa pamahog sang African Swine Fever

ILOILO — Ginatutukan sang Iloilo Provincial Veterinary Office ang mga island barangays sa Northern Iloilo bangud sa pamahog sang African Swine Fever (ASF).

Kasunod ini sang report sang Department of Agriculture (DA) nga nakasulod na ang ASF sa Masbate.

Suno kay Provincial veterinarian, Dr. Daryl Tabuada, may posibilidad nga may nagasulod nga mga livestock halin sa Masbate sa mga island barangays ilabe na sa Estancia, base sa report sang livestock technician sang banwa.

Bangud sini, ilakip na suno sa iya sa ila monitoring kag reporting ang mga island barangays. Gin-ako niya nga nagakabalaka sila bangud malapit na sa Iloilo ang ASF.

Ginpasiguro man ni Tabuada nga plastado na ang quarantine kag disinfection team sa mga ports sa probinsiya kaupod ang personnel sang Philippine Coast Guard agud magbantay.

Pangayuan naman sang barangay certification ang mga nagadala sang buhi nga baboy halin sa island barangays padulong sa mainland sa Northern Iloilo.

Suno kay Tabuada, una nila nga gin-tap ang mga livestock technician sa mga banwa nga amo naman ang mapahibalo sa mga punong barangays sa island barangays.

Mapadulong sa Lunes, Pebrero 15 si Tabuada sa Northern Iloilo agud sapulon ang mga alkalde kag iplastar ang mangin sistema.

Ginhaylo man niya ang mga punong barangays ilabe na sa island barangays nga mangin vigilant agud maproteksyunan ang swine industry sa probinsiya.

Kun may makita suno sa iya nga baboy ukon pork products nga nakasulod sa barangay halin sa Masbate, gilayon nga i-report sa Municipal Agriculturist ukon Provincial Veterinarian agud makahimo sang aksyon.