11-anyos nga bata nga babaye, patay sang gin-strafing ang balay sang iya tiya sa Badiangan, Iloilo

By: Aine Grace Bravo | February 15, 2021

Badiangan, Iloilo —Patay ang 11-anyos nga bata nga babaye nga si Mary Jane Eucogco Jano alyas Poypoy sang Barangay Calansanan, Badiangan sang gin-strafing ang balay sang iya tiya sa diin nagtenir ang biktima las otso kagab-i, Pebrero 14.

Igo sa dalum sang iya wala nga dulunggan ang nagpatay sa bata. Wala nakalusot ang bala.

Nagapungko sa berha sang balay ni Rosalie Eucogco Cepeda si Poypoy upod sa duha pa niya ka manghod sang nabatian ang “burot” sang pusil.

Nahulog sa berha ang bata sang naigo samtang nagkamang naman ang iban pa nga yara sa sulod sang balay.

Suspetsado sa pagpangluthang si April John Valle, 30-anyos sang Sitio Kinambud Barangay Matag-ub, Janiuay kag duha pa ka iban. Iping lang nga barangay ang Calansanan kag Matag-ub.

Pila ka oras antes ang strafing, nakabais sang tiyo ni Poypoy nga si Richard Eucogco si Valle, nga ginpahayag naka-inom sang amo nga tiun, bangud sa balloon.

Suno kay Richard, las singko kahapon sang hapon samtang pauli sila halin sa ila gin-obrahan sa Damires, Janiuay sang nakit-an nila nga nawigit halin sa pula nga SUV ang duha ka balloon.

Ginpudyot sang pamilya Eucogco ang balloon. Sa unhan nagdulog ang motorsiklo nga ginasakyan ni Valle. Ginpatihan sang pamilya Eucogco nga upod si Valle sang tag-iya sang balloon kabangdanan nga gin-uli nila ang isa ka balloon samtang ang isa ginbilin sa ila.

Pero paglab-ut sa unhan nga sakop na sang Jibolo, Janiuay, liwat ginbalabagan sang motor ni Valle ang karsada kabangdanan ginsita siya ni Richard.

Diri na kag nagluntad ang pagbaisay tubtob natapungulan ni Richard si Valle.Base sa alegasyon ni Richard ginpulihan pa siya sang mga kilala ni Valle sa amo nga lugar kabangdanan napilasan siya sa ulo.

Nagdiretso sa police station ang magtimbang nga bahin kag na-settle man ang problema.

Pagkagab-i, diri na kag gin-strafing ang balay ni Cepeda sa diin nagatipon ang pamilya. Lapitanay ang balay ni Cepeda kag sang biktima.

Matapos ang linupok, nakita sang lolo nga si Wilson Eucogco ang suspetsado nga nagapalagyo upod sa iya kaupdanan.

Kumbinsido ang lolo nga si Valle ang nagpangluthang bangud pareho ang suksok sini nga T-shirt sang hapon nga nakabais siya ni Richard.

Nadakpan si Valle sa balay sang iya utod sa Jibolo kag preso subong sa Badiangan Police Station.

Gin-deny niya ang kahilabtanan sa krimen. Desidido ang pamilya Eucogco nga magpasaka kaso. — via Aksyon Hotline