Pagbakuna sa mga healthcare workers sa WVMC gamit ang Sinovac COVID-19 vaccine, posible hiwaton sa Marso 8
Iloilo City — Posible hiwaton sa Marso 8 ang pagbakuna sa mga healthcare workers sang Western Visayas Medical Center gamit agn Sinovac vaccine.
Ini ang ginkumpirmar ni Mr. Richard Saltin, Spokesperson for COVID-19 concerns sang WVMC pagkatapos sang sinapol nila sa Department of Health 6.
Suno kay Saltin, ginpahayag sang DOH6 nga posible maabot ang supply sang Sinovac sa rehiyon sugod bwas, Marso 4 tubtob sa Marso 7.
Lakip ang Western Visayas sa nakabaton sang supply halin sa 600,000 doses sang Sinovac vaccine nga ginhatag sang China sa pungsod.
Naga-survey ang WVMC sa ila mga personnel kun sin-o ang luyag magpabakuna gamit ang Sinovac vaccine.
Sa survey sang WVMC sang nagligad nga bulan, 899 sa 1995 ka mga healthcare personnel nila ang luyag magpabakuna apang gamit ang Pfizer ukon AstraZeneca vaccines.
Posible magbag-o ang numero bangud Sinovac ang pagagamiton nga bakuna.Suno sa mga eksperto, 50.4% lang ang efficacy ukon pagka-epektibo sang Sinovac agud malikawan ang mild to moderate cases apang 100% naman ang pagka-epektibo agud indi maglala ang medical condition sang ginbakunahan.
Una nga wala gin-recommend sang Food and Drug Administration ang paggamit sang Sinovac sa mga healthcare workers bangud sang risgo sa ila trabaho apang ginbawi ini sang DOH kag nagpahayag nga importante ang pagpabakuna gamit ang bisan ano nga brand.
Ang iban pa nga mga ospital sa Western Visayas nga referral hospital sa una nga batch sang Sinoac vaccines amo ang West Visayas State University Medical Center, St. Paul’s Hospital, Iloilo Doctor’s Hospital, Corazon Locsin Montelibano Memorial Regional Hospital, kag Dr. Pablo Torre Memorial Hospital.
