Away sa duta, daan nga hiligut-anon, ginatan-aw motibo sa pagtiro patay sa 26-anyos nga babaye sang iya man lang pakaisa sa Banate, Iloilo

ILOILO – Away sa duta kag daan nga hiligut-anon ang ginatan-aw sang Banate police nga motibo sa pagtiro patay sa 26-anyos nga babaye sang iya man lang pakaisa sa Sitio Punta, Brgy. Merced, Banate Iloilo mga las 9 sang aga sang Sabado, Abril 30.

Suno kay PMSg Joelito Babayo, imbestigador sang Banate MPS, ginkilala ang biktima kay Joyce Ferrer samtang ang suspek amo si Mel Ferrer, 46-anyos.

Dugang ni PMSg Babayo, lima pa lang ka bulan nga naga-istar si Joyce sa Barangay Merced.

May pilas sa dughan si Joyce tuga sang .45 caliber pistol. Ginpahayag sang pulis nga nakadalagan pa si Joyce, pero natumba gani naabtan sang iya pakaisa kag gintiro.

Wala naman sang intensyon si Mel nga patyon ang iya pakaisa, suno kay Irenen nga asawa sang suspek.

Suno kay Irene, malibod lang kuntani sang isda ang tuyo sang iya bana kag ginpromisahan pa siya sang bana nga sugaton sila sang ila bata sa balay sang iya iloy sa Barotac Viejo.

Ginbuyagyag man niya, nga nagaplano siya nga maghalin sa ila balay bangud natamaran na siya sa mga pabati-bati sang mga pakaisa sang iya bana ilabe na gid ni Joyce.

Sa alegasyon ni Irene, Abril 29 sang gab-i, nagkadto ang biktima sa ila balay kag nagpangbuyayaw, nagsinggitan kag ginbulya-bulya pa ang ila nga kudal, rason nga nagtawag siya sang pulis.

Sa panaysayon naman ni El El, bata ni Irene, nagahimos sila sang lutuon nga isda upod sa iya amay sang nagsulong si Joyce sa ila balay kag nagpamuyayaw.

Ini ang rason nga na-impito si Mel kag ginlagas ang iya pakaisa kag gintiro sa dughan.

Wala naman makabalo si Irene kun diin nagkuha ang iya bana sang pusil nga gingamit sa pagtiro kay Joyce.

Ginsugid man ni Irene nga sang April 21 sini nga tuig, ginsumbag siya ni Joyce bangud man sa away pamilya.

Desidido nga magkooperar si Irene sa kapulisan agud makabulig sa pagdakop sa iya bana. – via Cedrick Anona