Mrs. Zyla Defensor, mapasaka gid sang kaso batok sa mga ginreklamo niya nga nagpang-harass sa iya kag nagpakilala nga tinawo ni Mina, Iloilo Mayor Rey Grabato

MINA, ILOILO – Mapasaka gid sang kaso si Zyla Defensor batok Ronelo Petipet nga ginreklamo niya nga nagpang-harass sa iya kag nagpakilala nga mga tinawo ni Mayor Rey Grabato sang Mayo 13 sang aga sa Brgy. Bangac.

Suno kay Defensor, pasakaan niya sang kaso ang tanan nga involved sa pagpang-harass sa iya kag tinguhaan niya man nga makilala ang lalaki nga nakit-an sa iya video nga may bitbit nga pusil.

Nagapati si Defensor nga tinawo man ni Mayor Grabato ang lalaki bangud nga naghalin siya sa arusera sang alkalde nga nahamtgang man sa lugar.

Gin-ako niya nga nagaduha-duha pa siya sa identity sang lalaki bangud nga naka-face mask ini kag nagduko sang gintayaan niya sang camera.

Pero ginpahayag ni Defensor nga makilala niya ang lalaki kun liwat niya nga makita. Ginreklamo ni Defensor si Petipet upod sa iya mga tinawo nga nagpanggabot sang iya mga kudal bangud sa gina-agawan nila nga duta.

Gina-claim ni Petipet nga iya ang duta pero ginapanindugan naman ni Defensor nga nabakal niya ini sang 2020 kag may ginauyatan siya nga deed of sale.