‘SUSPECTED SINKHOLE’ SA MUELLE LONEY, CITY PROPER GINABANTA NGA NAGALAPAD SANG 1 KA METRO – PSTMO

ILOILO CITY – Ginabanta isa ka metro ang kalaparon kag tunga sa metro ang kadalumon sang nagtuhaw nga “suspected sinkhole” sa porsyon sang dalan sa Muelle Loney Street, City Proper.

Suno kay Public Safety and Transportation Management Office (PSTMO) Head Jeck Conlu, una nga may nakit-an nga litik sa porsyon sang dalan mga las-singko sang hapon, Agosto 18, kag nag-usmod ang semento tubtob nagtuhaw ang buho, pila ka minutos ang nakaligad.

“Nag-usmod na siya kag nagporma na sang isa ka buho kag sa pagtan-aw naton to kaina, medyo hollow na ang dalom ‘ya. Siguro ang lapad niya mga one meter,” suno kay Conlu.

Posible nga maglapad ang buho kun indi gilayon nga makay-o bangud naga-agi ang madamo nga salakyan lakip na ang mga trucks sa amo nga dalan. Gilayon nga ginbutangan sang taga-PSTMO sang baral ang apektado nga porsyon agud malikawan sang mga motorista.

Nagpasalig man ang taga-Department of Public Works and Highways (DPWH) nga gilayon usisaon ang apektado nga porsyon sang dalan subong nga gab-i. National road ang nasambit nga kalye. –KhenJo Terco