Super Typhoon #HenryPH, wala sang direkta nga epekto sa Western Visayas — PAGASA-Iloilo
Manubo ang tsansa nga mapaidalum sa storm signal ang Western Visayas bangud sa Super Typhoon #HenryPH.
Paathag ni Engr. Rolly Cuenca sang PAGASA Iloilo, “Wala sang direkta nga epekto sa Western Visayas ang Super Typhoon Henry.”
Suno kay Cuenca, gina-forecast nila nga indi mag-landfall ang super typhoon bangud ara lang ini sa kadagatan. Ginalauman naman nga magguwa sa Philippine Area of Responsibility ang super typhoon sa Sabado sang gab-i ukon Domingo sang aga.
Gina-enhance naman sang bagyo ang habagat kag ini ang rason sang panalagsa nga pag-ulan ukon thunderstorms sa rehiyon, dugang ni Engr. Cuenca.
Sa las-kuwatro kaina sang kaagahon nga bulletin sang PAGASA, nasiplatan ang sentro sang mata sang Super Typhoon Henry 530 km East Northeast sang Itbayat, Batanes nga may kabaskugon sang hangin nga 185 km/h malapit sa sentro kag pagmadlos nga 230 km/h.
Samtang, ang isa pa ka bagyo nga si Tropical Depression #GardoPH ginabanta sa kalayuon nga 920 km East Northeast sang Extreme Northern Luzon nga may kabaskugon sang hangin nga 55 km/h malapit sa sentro kag pagmadlos nga 70 km/h.
