Barangay council sang Villa Pani-an, Estancia, nagdihon sang resolution nga nagakondenar sa shooting incident sa ila lugar

ILOILO — Nagdihon sang resolution ang Brgy. Pani-an, Estancia, nga nagakondenar sa pagpatay sa mag-abyan nga sanday JP Bosque, Mark Libao, kag Floyd Fernandes sang Setyembre 14 sang kagaahon.

Suno kay Punong Barangay Zaldy Basio, wala nila ginatolerar ang kasubong nga buluhaton sa ila lugar.

Nagpanugyan man siya sa iya mga barangay officials kag mga tanod nga magpakig-angut sa police kun may mabatian sila nga mga impormasyon nga makabulig sa pagsolbar sa krimen.

May budget naman ang barangay sa pagpatakod sang CCTV camera sa ila lugar bangud dako ang mabulig sini kun may magkalatabo.

Sa pagkamatuod suno sa kapitan, may CCTV camera man sila sadto apang naguba sang bagyo

‘INDI RESIDENTE’

Ginkumpirmar naman ni Punong Barangay Bacio nga indi residente sang Villa Pani-an, si Jevron Parohinog, ang isahanon nga nakaluwas sa shooting incident.

Suno sa kapitan, bag-o lang nakabakal sang lote ang pamilya ni Jervron sa Villa Pani-an nga ginpatindugan nila sang balay.

Sa pagkamatuod suno sa iya, indi rehistrado nga mga residente sang ila barangay ang pamilya Parohinog.

Dugang niya, wala man nagatenir si Jevron sa Villa Pani-an kag ang amay niya lang ang nagabakasyon diri.

Indi man sigurado si Basio kun nagatenir sa Villa Pani-an ang amay ni Jevron bangud nga may balay man sila sa Sitio Calumpang.