DPWH 6 nagplastar sang mga solusyon sa nakit-an nga mga problema sa Ungka Flyover

Naghatag sang kaathagan si Department of Public Works and Highways (DPWH 6) Asst. Regional Director Jose Al Fruto sa mga problema sa Ungka Flyover pareho sang pag-usmod, pagdanaw kag paglitik.

Sa ginpatawag nga inquiry ni City Councilor Sedfrey Cabaluna kaina sang aga upod ang taga-DPWH, contractor nga International Builders Corporation (IBC) kag Transportation heads sang Leganes, San Miguel kag Pavia, ginplastar man ni Engr. Fruto ang pila ka “engineering interventions” sa nasambit nga problema.

VERTICAL DISPLACEMENT UKON PAG-USMOD

Gintumod ni Fruto ang paghimo sang “jet grouting” ukon pagtublok sang semento sa mga pundasyon nga apektado sang vertical displacement agud nga maghugot kag indi na maghulag ang pier 4, 5 kag 6.

Target sang DPWH 6 kag sang IBC nga matapos ang jet grouting antes ang paskwa.

PAGDANAW

Gin-ako ni Engr. Fruto nga nalipatan nila nga buhu-an para sa drainage ang flyover sang ginbutangan sang first layer sang aspalto.

Nagdugang man suno sa iya sang pagdanaw ang vertical displacement.

Ginbutangan na suno sa iya sang drainage agud indi magdanaw kag matulu-an ang mga salakyan nga nagalabay sa idalum sang flyover.

PAGLITIK

Sa nakit-an naman nga mga litik, ginpaathag ni Fruto nga nagalitik gid man ang aspalto kun maulanan kag mainitan ilabe na kun first layer pa lang.

Magluwas sini, ginhungod man nila nga “kuritan” ang flyover agud makasungaw ang aspalto kag may mga ulubrahon pa sa ibabaw nga wala pa matapos.

Ginpahayag ni Fruto nga ginbutangan na nila sang layer sang semento ang aspalto agud indi maglitik bisan maulanan kag mainitan.