Duha ka babaye, nagdumugay sa Hall of Justice; lalaki nga inmate, gin-agawan sang mga babaye

Iloilo City–Nadisturbo ang mga hearings sa Hall of Justice matapos nabatian ang singgitanay kag linagumba sa sulod sang comfort room sa ground floor kaina sang aga.

Nakita nga nagadumugay ang duha ka babaye nga pareho naga-claim nga asawa sang inmate nga lalaki nga gindala sa Hall of Justice para sa arraignment sang iya kaso may kaangtanan sa illegal drugs. Ginpahayag nga nagkadto sa CR si alyas Monique sang nagsunod si alyas Sharon antes ang ila pag-inaway.

Ang lalaki, preso sa BJMP Ungka samtang si alyas Sharon ang preso sa BJMP District Jail-Female Dormitory bangud sa kaso sa illegal drugs. Napilasan sa kamot ang isa sa duha ka babaye samtang hipos lang ang lalaki nga gin-agawan. (AGB)