Tigbauan Vice Mayor Virgilio Teruel, nagdepensa sa municipal ordinance nga nagaregulate sang STL

Tigbauan, Iloilo–Gindepensahan ni Vice Mayor Virgilio Teruel ang municipal ordinance nga nagaregulate sa pagpataya sang Small Town Lottery sa banwa.

Suno sa bise alkalde, indi anti-koridor ang ordinansa bangud puwede gihapon makalibot sa banwa ang mga koridor. Ginaregulate suno sa iya sa ordinansa ang pagpataya bisan diin lang pareho sang sidewalks, malapit sa eskuwelahan kag simbahan. Luyag man sini nga ibutang sa designated nga mga lugar ang betting station pareho sang merkado publiko.

Sa schedule sang pataya halin alas-6 sa aga tubtub alas-7 sa gab-i, gin-athag ni Teruel nga ginaproteheran sini ang mga pumuluyo kag kabataan bangud pila ka koridor ang nagabugtaw sang aga pa agud maglibot kag magpataya.

Gin-athag man ni Teruel nga ginkonsulta ang mga koridor antes ginpasar ang ordinansa. (AGB)