Pila ka mga predictions sa 2023 ginplastar sang Ilonggo Feng Shui expert
ILOILO CITY – Ginapanan-aw bilang “Year of Hope” ang 2023 nga Year of the Water Rabbit, base sa prediction sang Ilonggo Feng Shui expert nga si Mystique Warrior.
‘Health’
Mabatyagan gihapon ang COVID-19 pandemic sa masunod nga tuig pero ang maayo bangud magapabilin ang fighting spirit kag pagpangamuyo sang mga tawo.
Base sa prediction ni Mystique Warrior, may balatian naman nga matuhaw sa 2023 pero nakahanda suno sa iya ang mga scientists kag mga doctors para diri.
Mas madamo man nga dialysis center ang magabukas bangud magadamo nga mga tawo nga magabalatian sa kidney. Base sa ila pagtuon sa Feng Shui, Year of the Water Rabbit ang 2023 kag maangut ini sa kidney gani dapat halongan ang kidney paagi sa pag-inom sang walo tubtob 10 ka baso sang tubig kada adlaw kag paglikaw sang salty foods.
Ginapan-aw man niya ang pag-ayo sang mga nagabalatian nga padayon nga nagabato kag nagalaum nga maga-ayo sa diin gina-angut sa tuig sang paglaum.
‘Economy’
Makabawi ang ekonomiya sang pungsod ilabe na sa Iloilo sa masunod nga tuig bangud sa kahalitan sang COVID-19 pandemic.
Nakita man niya nga madamo nga mga government projects ang makabulig sa ekonomiya paagi sa paghatag sang palangabuhian kag employment sa mga tawo.
Magasanyog suno sa iya ang mga negosyo nga may kaangtanan sa tubig pareho sang water station. Magluwas diri, magabalik ang crypto currency bangud tuig man sang mga brokers kag real estate ang 2023.
“Ang mga nakapundar na [sa negosyo] kag kun nami ang dalagan sang nila negosyo, maganami pa gid,” dugang pa ni Mystique Warrior. Ginhaylo man niya ang mga nagaplano nga magnegosyo nga dayunon ini pero dapat ikabuhi ang “positive mindset” agud magmadinalag-on.
‘Love’
Base sa prediction ni Mystique Warrior nga madamo nga mga pamatan-on ang mangin vulnerable sa masunod nga tuig nga posible magresulta sang pagtaas sang teenage pregnancy. Ginpanawagan niya sa mga ginikanan ang husto nga paggiya sa kabataan agud malikaw sila.
Sa 2023 mangin agresibo suno sa iya ang mga babaye ilabe na ang ginbun-ag sa Year of the Rabbit. “Kay kun sin-o ang gusto nila nga lalaki, ipursige gid nila kag makuha nila basta pursigido lang sila when it comes to love,” dugang pa niya.
Sa mga luyag naman magpakasal sa masunod nga tuig, ginpanugyan ni Mystique Warrior nga magpakasal sa Enero 22, ang labing una nga new moon sa 2023.
Puwede man sa new moon sang Mayo kag Hunyo “because new moon is a new beginning, nagapadako nga daku ang bulan “and it affects our lives.” Manami man kun magpakasal sa November kag December sa masunod nga tuig
Sa pagpatindog naman sang balay mas maayo kun masuguran ini sa petsa sang new moon tubtob sa quarter moon.
Ang compatible sa Year of the Water Rabbit, ang mga ginbug-ag sa Year of the Dog, Pig, kag Sheep samtang indi naman compatible ang mga ginbun-ag sa Year of the Rooster, kag Rat.
‘Calamities’
Gina-predict man ni Mystique Warrior nga may pagbaha sa gihapon sa siyudad sa masunod nga tuig ilabe pa nga Year of the Water Rabbit.
Nakita man niya ang mga magaluntad nga sunog sa Iloilo City bangud sa pag-struggle sang mga elemento.
Nagapati siya nga posible nga indi man ini matabo kun magpadayon lang sa pagpangamuyo ang mga tawo.
‘Career’
Mangin maswerte sa Year of the Water Rabbit ang mga radio announcers, reporters, disk jockeys, kag call center agents, dugang ni Mystique Warrior.
Magluwas diri, ginapanan-aw man niya ang madamo nga employment sa masunod nga tuig bangud sa sa pagdamo sang investments sa siyudad.
Pero suno sa iya nga nakadepende gihapon sa paghimakas sang tawo ang pag-umwad sang iya kabuhi kag karera.
Gin-athag ni Mystique Warrior nga ginbase ang iya prediction sa calculation sang lunar cycle, star, power sang energy kag elements.
Bangud Year of Water Rabbit ang 2023, ginpahayag niya nga indi dapat mawad-an sang tubig sa mga panimalay, tubig nga gina-inom kag ginapaligo “because water will really give life.”
