ILOILO — Ginkumpirmar sang Oton Municipal Police nga napatay ang ginakabig nga notorious nga kawatan sa Iloilo nga ginkilala kay Reymark Sinco alyas Lupin.
Suno kay Police Major Fernand Limbungan, hepe sang Oton MPS, natiruhan sang wala pa makilala nga suspek si Lupin samtang nagalabay sakay sa iya motorsiklo sa atubangan sang Vista Mall sa Brgy. Maestra Vita, Oton las 12:13 kaina sang kaagahon.
May igu sang bala sa ulo si Lupin halin caliber .45 base sa tatlo ka basiyo sang bala nga narekober sa crime scene.
Gindala pa sang Oton Search and Rescue Team (OSART) si Lupin sa Western Visayas Medical Center pero gindeklarar nga napatay.
Nagapadayon pa ang imbestigasyon sang kapulisan sa insidente.
Si Lupin ang menor-de-edad nga na-rescue sang mga tanod kag barangay officials sang Cagbang, Oton sang Hulyo 2, 2022 sang kaagahon bangud naglapas sa curfew, kag nagbuyagyag sa mga pulis nga nagapangawat siya kag may “handler” siya.
Magluwas sa mga record sang pagpangawat sa ila barangay sa Santa Barbara, kag sa Pavia, nausisaan man sang Aksyon Radyo News Team nga may record pa gid si Lupin sang pagpangawat sa Batad sang 2020.
Read background: https://bit.ly/3GN4SnU
