ILOILO CITY — Malapit P200,000 ang kahalitan sang pagsigabong sa storage facility sang Regional Explosive Ordnance and Canine Unit (RECU) 6 sa ICPO compound sa General Luna, Street, City Proper sang, Enero 8.
Suno kay Iloilo City Police Office (ICPO) Spokesperson Police Major Shella Mae Sangrines, gin-report sang RECU 6 “Ang cost of damages nga gintuga sang nasambit nga explosion nga sa diin nag-cover to siya sang mga nagkalain-lain nga supplies kag equipment sang talatapan, naglab-ot sa kabug-usan nga P199,500.”
Wala pa nadala sa nasambit nga kantidad ang kahalitan sa Traffic Investigation and Management Unit (TMEU) kag City Drug Enforcement Unit (CDEU) sang ICPO nga nadalahig man sa pagsigabong.
Ginahulat pa ang resulta sang imbestigasyon sang Scene of the Crime Operatives (SOCO) kag sang Bureau of Fire Protection-Iloilo City sa insidente.
Ginkumpirmar ni Sangrines nga maayo na ang sitwasyon sang tatlo ka mga napilasan lakip na si Patrolwoman Shyrene Manuel sang RECU 6.
Una na nga gin-report nga inappropriate temperature ang ginatudlo nga rason sang pagsigabong sa storage facility sang RECU 6.
