ILOILO CITY – Wala sang record sa illegal drugs ukon ginamo sa ila barangay si Emmanuel Señolay, ang tricycle driver nga isa sa 32 ka nadakpan sa drug buy bust operation sa Bakhaw, Mandurriao sang nagligad nga semana.
Ginapanindugan ini ni Amira nga live-in partner ni Señolay.
Suno kay Amira, “wala gid siya [gagamit illegal drugs]. Ang amon kinitaan husto lang sa pagkaon kag pangbayad. Mag-amo pa na siya, diin kami makuha sang panggasto namon?”
Ginsaysay ni Amira nga nagabiyahe sang tricycle si Señolay halin las-tres sa hapon tubtob las-kuwatro sa kaagahon.
Sa pag-istorya ni Amira sa iya live-in partner, may gindul-ong siya nga duha ka lalaki nga pasahero halin sa Megaworld pakadto sa Bakhaw. Pero matapos dul-ong sa duha, ginpabutyag ni Señolay nga ginhawiran siya sang mga pulis tungod istoryahon pa siya pero lakip na siya sa gindakup.
Ginpahayag ni Amira nga mangayo na lang sila sang bulig sa Public Attorney’s Office (PAO) tungod indi man nila masarangan ang piyansa para sa temporaryo nga kahilwayan sang iya live-in partner.
Sanday Amira kag Señolay ang may isa ka bata nga duha ka tuig pa lang ang edad. Gin-ako ni Amira nga nabudlayan siya tungod wala man siya sang palangabuhian kag nagasalig sa subong sa bulig sang iya mga tiyo. –via Aksyon Hotline
