ILOILO — Patay ang 26-anyos nga helper sa isdaan sang gintiro sang nagabaligya isda sa Barangay Baybay Norte, Miagao.
Suno kay Police Major Richard Lao, hepe sang Miagao Municipal Police Station, lunsay naka-inom sang makahulubog nga ilimnon ang biktima nga si alyas Alvin kag suspek nga si alyas Apa, 44-anyos.
Base sa imbestigasyon sang mga pulis, nagbaisay ang suspek kag biktima sa presyo sang isda.
Sang nagalakat papuli ang biktima, ginlagas siya kag gintiro sang suspek.
Naigo si Alvin sa ulo kag abaga. Wala sang may na-recover nga basiyo sang bala.
Arestado naman ang suspek. — Aksyon Angel Mae Ciudad
