Gin-islan ang tanan nga hepe sang police stations sa Iloilo City.
Ini ang ginkumpirmar ni PCOL Joeresty Coronica, bag-o nga director sang Iloilo City Police Office, sa press conference subong nga aga.
Sa listahan nga gin-release sang ICPO, ang mga gin-relieve amo sanday PMAJ Shella Mae Sangrines (City Proper); PMAJ Val Ladublan (La Paz; PMAJ Eduardo Siacon, Jr. (Jaro); PMAJ Marlyn Roquero (Molo); PCPT Benjie Dicen, OIC Mandurriao; kag PMAJ Chen Tañagras, (Arevalo).
Ginpang-reassign sa ICPO Headquarters ang mga ginpang-relieve nga station commanders magluwas lang kay PCPT Dicen nga gin-reassign nga OIC sang Molo Police Station.
Ginpahayag ni PCOL Coronica nga may outstanding performance ang mga ginpang-relieve nga station commanders, pero kinahanglan nila nga magpanaug sa pwesto para sa mas mataas nga posisyon kag hatagan sang tsansa ang mga police captains nga magpamuno sa police station.
Wala suno sa iya sang kahilabtanan sa illegal drugs ang pag-relieve sa ila suno pa kay Coronica. Kasunod man ini sang gin-conduct sang drug buy bust operation sa Bakhaw, Mandurriao sa diin 32 ang nagkaladakpan kag na-recover ang malapit P1 million nga balor sang shabu.
OFFICERS-IN-CHARGE
Gin-assign nga OIC sang City Proper Police Station si PCPT Mavin Laraño tal-us kay PMAJ Shella Mae Sangrines.
Ginbutang nga OIC sang La Paz Police Station si PCPT Johanna Aguil bulos kay PMAJ Val Ladublan.
Nagpungko man nga OIC sang Jaro Police Station si PCPT Lester Oliveros tal-us kag Major Eduardo Siacon, Jr.; OIC sang Molo Police Station si PCPT Benjie Dicen bulos kay PMAJ Marlyn Roquero.
Ginbutang man nga OIC sang Mandurriao Police Station si PLTCOL Albert Sy tal-us kag PCPT Dicen; kag nagpungko nga OIC sang Arevalo Police Station si PCPT Resty Labasteda tal-us kay PMAJ Chen Tañagras.
Gin-athag ni PCOL Coronica, nga OIC pa lang ang designation sang mga station commanders tungod ipaidalum pa sila sa evaluation.
Kun mangin maayo ang ila performance suno sa iya, mahimo sila nga magpabilin sa pwesto.
