Buhang Flyover buksan sa publiko sa Marso — DPWH 6
ILOILO CITY — Pagabuksan na sang Department of Public Works and Highways (DPWH) 6 ang Buhang Flyover sa Jaro sa Marso.
Suno kay DPWH 6 Assistant Regional Director, Engr. Jose Al Fruto, natapos na ang “flyover proper” kag may mga ginatapos na lang nga ulubrahon sa approach sang imprastruktura.
Amat-amat naman nga ginatapos ang pagsemento sa approach sang Flyover nga yara sa Brgy. Tacas, Jaro.
Gin-umpisahan ang pag-construct sang flyover sang 2019 nga may P315 million nga pondo.
Nagalaba ini sang 200 meters kag may lima ka span.
Contractor sang proyekto ang F. Gurrea Construction, Inc.
Nagapati naman si DPWH 6 Regional Director Nerie Bueno nga makabulig sa ekonomiya ang Buhang flyover ilabe na gid nga masolbar ang traffic sa Circumferential Road 1 sa crossing Iloilo-Capiz Road.
