Masobra 12,000 ka indibidwal apektado sang pagbaha sa Antique tungod sang Bagyo Crising

Apektado sang pagbaha tungod sang wala untat nga ulan sa Antique ang 83 ka mga barangay sa 13 ka mga banwa.

Ginpahibalo ni Michaell Tolentino sang Local Disaster Risk Reduction and Management Office nga kabug-usan nga 3,274 ka mga pamilya ukon 12,242 ka mga indibidwal ang nabahaan.

Sa record sang LDRRMO sa probinsiya, ang 13 ka mga banwa amo ang Sebaste, Culasi, Tibiao, Patnongon, Hamtic, Lauan, Bugasong, San Jose, Sibalom, Valderrama, Belison, Barbaza, kag San Remigio.

Wala naman suno sa iya sang may gin-report nga napilasan, pero may duha ka indibidwal nga missing sa Sebaste tungod gin-anod sang baha sa suba.

Ginpahayag ni Tolentino nga sa subong, gina-assess pa ang extent sang kahalitan sa probinsya.