Ginalauman nga mabuksan sang National Economic Development Authority (NEDA) 6 kag Department of Public Works and Highways (DPWH) ang bidding sa mga luyag mangin contractor sang Panay-Guimaras Bridge (PGN) sa Marso.
Suno kay NEDA 6 director Arecio Casing, Jr., natalana i-turn over sang DPWH Project Management Office ang detailed engineering design sang PGN sa amo man nga bulan.
Sa katapusan sang Abril, mangayo gilayon sang update ang NEDA 6 kun kay sin-o gin-award ang proyekto.
Ginkumpirmar man ni Casing nga tanan nga proseso nga himuon antes umpisahan ang construction sang PGN ang mahalin sa DPWH Central Office.
May kalaba-on nga 32.47 kilometer ang Panay-Guimaras-Negros Island Bridge nga ginabug-usan sang duha ka sea-crossing bridges nga maga-angut sang Panay Island, Guimaras Island kag Negros Island.
P27 Billion ang ginpain nga pondo para sa PGN.
