ILOILO – Kadamuan sang mga Ilonggo ang nagahambal nga illegal parking ang rason kun ngaa madamo ang indi kuntento sa pagdumala sang trapiko sa siyudad sang Iloilo.
Ini base sa resulta sang informal survey sang Aksyon Radyo Iloilo.
10 ka rason ang ginplastar sa survey form kag puwede makapili ang mga respondents sang isa ukon masobra pa.
Sa tatlo ka adlaw nga survey, 300 ka mga respondents ang napamangkot sang Aksyon Radyo Iloilo news team kag 241 ang nagrason sang “Illegal parking” kun ngaa madamo ang indi kuntento sa traffic management sang siyudad.
Nagapangaduha ang “Madamo sang ginakutkot sa karsada” nga may 212, nagapangatlo ang “Tungod sa Ungka Flyover” nga may 205, nagasunod ang “Nagapanago ang iban nga Traffic Aides imbes maggiya sang traffic” nga may 186, kag “Indi maathag nga traffic signs” nga may 170.
Yari ang iban pa nga resulta:
• Patarasak kag kwestyonable nga panakup sang Traffic Aides – 165;
• Pangilkil sang iban nga Traffic Aides – 157;
• Mismo mga Traffic Aides wala naka-intiende sang traffic rules – 150;
• Indi LTO-deputized ang mga Traffic Aides gani indi maka-confiscate sang driver’s license – 146; kag
• Nubo sweldo sang Traffic Aides – 129.
Ginlunsar sang Aksyon Radyo Iloilo ang informal survey para mas lubos nga maintiendehan kun ngaa manubo ang ginhatag nga performance rating sa pagdumala sang traffic sa siyudad, base sa ginpa-commission nga RACI Survey ni Mayor Jerry Treñas.
Para mangin patas sa mga nagapangabudlay nga mga traffic personnel, imbes nga isentro lang sa pamangkot kun kuntento ukon indi kuntento, nagdugang ang Aksyon Radyo Iloilo sang mga pamangkot sa mga rason kun ngaa diskuntentado ang daku nga porsyento sang mga kasimanwa sa pagdumala sang traffic sa syudad.
Nakakuha sang -12% ang traffic management sa RACI Survey gani plano sang alkalde nga magkuha sang mga experts kag mag-coordinate sa MMDA para makahimo sang training sa mga traffic enforcers.
