PICAO Head Nerio Lujan indi makadesisyon kun mangin lecturer sa traffic management sang Iloilo tungod wala pa may nauyatan nga imbitasyon
Nagsabat na si Public Information and Community Affairs Office (PICAO) Head Nereo Lujan angut sa imbitasyon ni Iloilo City Mayor Jerry Treñas nga mangin 8-hour lecturer sa traffic management sang syudad.
Suno kay Lujan, indi siya makadesisyon kun tambungan niya ang imbitasyon ni Treñas tungod wala pa may nag-abot nga sulat sa iya opisina.
Dugang pa niya, kinahanglan nga mag-abot ang imbitasyon antes siya makadesisyon kun batunon niya ukon indi.
“The ball is in their (Iloilo City Government) hands kun may imbitasyon sila te lantawon ta eh. Ano bala ng considerations sang imbitasyon? Ano ang petsa?, Ano ang venue?, Ano ang audience?, Ano ang capacity sang resource speaker? kag ano ang purpose sang imbitasyon?, te wala ta kabalo kun ano ang gusto nila matun-an dapat may ara ka sang expected outcome.” pahayag pa ni Lujan.
Kinahanglan man suno sa iya nga may iplastar nga Term of Reference (TOR) ang Iloilo City government kun ano ang mangin kaundan sang lecture.
Sang damlag lang nagpaguwa sang statement si Treñas pinaagi sa iya press conference nga indi pagpiliton si Lujan kun wala siya sang tuyo nga maghatag sang lecture.
“Ah te kun indi siya, base waay man siya may i-share. Kung waay siya ma-share, indi ta siya pagpiliton. Indi ta kapuga sang tubig sa bato.” suno kay Treñas
Ginakabig ni Treñas nga kritiko sang syudad si Lujan tungod sa mga ginapang-post sa iya Facebook account nga mga laragway sa traffic management sang Iloilo City Government.
