Masobra tunga sa milyon nga cash nataban sang mga hold-upper sa mga personnel sang J&T Express sa Jaro

P622,966 ang cash nga nakuha sang tatlo ka mga hold-upper nga nagsulod sa opisina sang J&T Express sa Brgy. Quintin Salas, Jaro mga las-7:30 subong nga kagab-i, March 1.

Base sa imbestigasyon sang police, naga-inventory ang mga personnel sang J&T Express sang hinali lang nagsulod ang tatlo ka mga hold-upper.

Isa sa ila ang nakasuksok sang itom nga jacket, navy blue nga dilargo, bonnet kag helmet nga may duag nga green kag itom.

Naka-t-shirt naman sang puti, navy blue nga dilargo, itom nga sapatos, kag bonnet ang isa pa. Naka-bonnet man ang isa ka hold-upper.

Lunsay armado ang tatlo sang wala pa mahibaluan nga pusil.

Nagsulod ang tatlo sa opisina, ginsirado ang roll-up door kag nagdeklarar sang hold-up.

Nakuha man ang wallet sang finance officer sang opisina nga may unod nga ATM cards, mga IDs, P2,000 nga cash, kag cellphone nga nagabalor sang P6,000.

Nakuhaan naman ang isa pa ka personnel sang cellphone nga nabalor sang P4,000 kag vape.

Suno pa sa nakakita sang insidente, duha ka mga motorsiklo ang ginsakyan sang mga hold-upper nga nagtambay pa sa guwa sang opisina antes ang pagpang-hold-up.

Nagpalagyo padulong sa direksyon sang Tacas, Jaro ang mga hold-upper.

Nagapadayon ang hot pursuit operation sang kapulisan.