ANTIQUE — Ginhingagaw pa sa ospital ang 41-anyos nga mangunguma pero wala na natabangan tungod sa naagum nga pilas sang ginbuno sa Brgy. Cubay North Bugasong, Antique las-5:20 kaina sang kaagahon.
Ang biktima ginkilala kay alyas Rene samtang ang mga suspek ginkilala kanday alyas Mario kag alyas Rey.
Suno kay Police Staff Sergeant Arnel delos Santos, imbestigador sang Bugasong Municipal Police Station, naga-inum inom sa tyangge sang makahulubog nga ilimnon ang biktima upod ang iya abyan sang nag-abot ang mga suspek nga naga-angkasanay sa motorsiklo.
Pag-abot sa lugar, nagpanaog ang angkas nga si Dalmacio kag naghambal nga, “Ano gusto niyo haw?” kag gulpi lang ginbuno ang biktima sa tuo nga dughan.
Ginpahayag sang police nga “hubog-hubog” ang biktima gani wala nakadepensa. Wala naman napilasan ang iya abyan.
Sa pagpangusisa sang police, indi ang biktima ang kontra sang mga suspek gani ginalantaw nga napaukpan sang kaakig.
Nagpalagyo ang mga suspek padulong sa banwa sang Bugasong kag padayon nga ginapangita paagi sa hot pursuit operation.
Na-recover sa lugar ang motorsiklo sang mga suspek kag ang holster sang pusil.
Samtang, desidido ang pamilya sang biktima nga pasakaan sang kaso ang mga suspek, suno sa police. — Aksyon Paula Elambayo
