Resulta sang imbestigasyon sa Ungka flyover ginalauman nga ma-release sa katapusan sang Marso

ILOILO – Ginpasalig sang Abinales Associates Engineer + Consultants, ang nagdaug nga consulting firm nga ma-imbestigar sa controversial nga Ungka Flyover nga ma-release ang resulta sang imbestigasyon sa Department of Public Works and Highways (DPWH) 6 sa katapusan sang bulan.

Suno kay DPWH 6 Director Engr. Nerie Bueno, antes pa gin-conduct ang bidding sa mga kilala nga consulting firms iya personal nga gin-istorya ang mga ini nga kun sin-o man ang madaug dapat makapaguwa sila sang resulta antes magtakop ang bulan.

Gin-athag naman ni DPWH 6 Assistant Regional Director Engr. Jose Al Fruto nga bisan mahalin sa Abinales Associates Engineer + Consultants ang rekomendasyon sa engineering intervention, nagakinahanglan gihapon ini nga i-assess sang mga engineers kag opisyales sa central office.

Indi naman ang consulting firm ang maobra sang intervention.

Tatlo ka bulan ang mangin kontrata sang consulting firm sa DPWH 6 agud tun-an kag tukibon ang mayor nga rason sa pag-usmod sang tatlo ka haligi sang flyover. — via Aksyon Cedrick Anona