ILOILO— Dead-on-arrival sa ospital ang driver samtang pilason ang iya nga angkas sang nagbunggu-anay ang ginasakyan nga motorsiklo kag transit mixer sa bypass road sa Barangay Tingui-an, Balasan kahapon, May 8.
Suno kay Police Lieutenant Dennis Fernandez, deputy station commander sang Balasan Police Station, halin sa banwa sang Balasan kag padulong sa Batad ang motorsiklo nga ginamaneho sang 35-anyos nga taga-Anoring, Sara samtang angkas ang 29-anyos nga babaye.
Pakadto naman sa ginakay-o nga dalan ang mixer nga may karga pa nga semento, suno sa pulis.
Sa imbestigasyon, pag-abot sa intersection nagtabu-anay ang motorsiklo kag mixer.
Base sa impact suno sa pulis, pareho nga madasig ang pagpadalagan sang duha ka mga drivers.
Gindala pa sa ospital ang driver sang motorsiklo pero napatay tungod sang pilas sa lawas.
Gin-detain sa Balasan Municipal Police Station ang driver sang mixer kag ginapreparar sang pulis ang mga dokumento kon magpasaka sang kaso ang pamilya sang napatay. — Aksyon Farrah Mae Morano
