Lalaki nga nasapwan nga pilason sa Leganes napreso sang 2016 tungod sa buy bust operation – police
LEGANES, ILOILO – Napreso sang 2016 tungod sa kaso may kaangtanan sa illegal drugs kag nakaguwa sang 2022 tungod sa plea bargaining agreement si Glen Paloma, ang lalaki nga nasapwan nga may pilas sang pagkatiro sa Brgy. Calaboa kahapon sang aga, Marso 26.
Suno ini kay Capt. John Robles hepe sang Leganes Municipal Police Station base man sa ila pagpangusisa sa live-in partner ni Paloma. Halin sang nagguwa siya sa presuhan wala na nagpauli pa si Paloma sa Aganan, Pavia kag sa utod na sang iya live-in partner sa City Proper nagatinir.
Gina-trace pa sang police kun diin gin-pick up si Paloma sang mga may kahimuan sang krimen base sa mga CCTV footage nga ila ginatipon.
Dugang pa ni Robles, mga las-11 kagab-i, naglisensiya pa si Paloma nga mabakal sang burger malapit sa Plaza Libertad. Natingala na lang ang iya ka-live in nga nakalab-ot siya sa Leganes.
‘MOTIBO’
Ginasundan nga motibo sang kapulisan ang gina-alegar drug trade nga gin-intrahan sadto ni Paloma. Posible man nga may mga tawo nga may kaakig sa biktima.
Nakaguwa na sa operating room si Paloma kag padayon pa nga gina-obserbaran sa ospital.
Una na ginpahayag ni Maj. Dadjie Delima, hepe sang Pavia Police Station nga wala sang record sa ila sa Paloma.
PANAWAGAN SANG HUSTISYA
Nagahilibiun nga nagapanawagan sang hustisya ang live-in partner ni Paloma.
Suno kay alyas Regie, nagbakal sang hamburger ang iya live-in partner sa Plaza Libertad mga las 11:00 sang gab-i sang Marso 25 pero naagahan lang wala na siya nakabalik.
Nakibot na lang si Regie sang nasapwan sa Calaboa, Leganes ang iya live-in partner nga duguon, may gapos ang kamot sang plastic tape kag alambre pero iya nahukas. Nakagapos man ang tiil sang biktima.
Ginpahayag ni Regie nga wala man sang may ginsugid nga kaaway ang biktima sang napreso siya sa BJMP-Ungka. Pero may nasugid siya nga may upod siya sang una sa presuhan nga nakaguwa kag nangin asset sang otoridad nga wala niya ginhingadlan.
Padayon nga ginabulong sa Western Visayas Medical Center ang biktima nga may lima tubtob anum ka pilas sang pagkatiro sa lawas.
