1 patay sang nagkarambola ang 4 ka salakyan sa Zarraga
ILOILO — Isa ang patay kag duha ang pilason sang nagkarambola ang apat ka mga salakyan sa Barangay Sambag, Zarraga kahapon, Marso 29.
Ginpahayag ni PCPT Raffy Señerez, hepe sang Zarraga police station, involved sa aksidente ang Ford Everest, Toyota Vios, Isuzu truck nga may karga nga bubod kag motorsiklo.
Ginkilala ang napatay kay Julius Desucatan sang Barangay Tiwi, Barotac Nuevo, ang driver sang Ford Everest. Suno sa truck driver nga si Felino Sira sang Trapiche, Oton, padulong siya sa direksyon sang Dumangas sang nasugata ang naga-overtake nga Everest.
Malayo pa lang nakita niya na nga madasig ang pagpadalagan sang Everest nga nag-overtake sa ginabanta lima ka mga salakyan.
Ginwarik ni Sira ang iya manibela agud magpahigad apang nakabunggo gihapon sa kilid sang truck ang SUV. Nagbalang-balang ang SUV kag nabungguan ang awto nga ginamaneho ni Edmundo Cortez sang Lopez Jaena St., La Paz.
Posible naman suno kay Sira nga nalingaw sa paglantaw sa aksidente ang motorsiklo nga ginamaneho ni Florante Paraiso sang Talibong, Zarraga, nga nagapadulong man sa direksyon sang Dumangas rason nga nakabunggo sa likod sang truck.
Minor nga kapilasan ang naagum sang driver sang awto kag driver sang motorsiklo samtang conscious kag gina-obserbaran sa ospital ang duha pa ka sakay sang SUV. Wala naman napilasan ang truck driver kag iya helper.
