ILOILO — Anum ang ginkasuhan lakip na ang duha ka police sa pagtiro kay Glen Paloma nga ginhal-id sa talamnan sa Barangay Calaboa, Leganes las-5:30 sang kaagahon sang Marso 26.
Suno kay Iloilo Police Provincial Office (IPPO) Director Police Colonel Ronaldo Palomo, ginpasakaan sang kaso nga frustrated murder kag Section 29 (Criminal Liability for Planting of Evidence) sang RA 9165 (Comprehensive Dangerous Drugs Act of 2002) kanday John Ian Leda, tag-iya sang Abe’s Payag Restaurant sa C1 road, Pavia; security guard sang restaurant nga si Ricky Giluani; duha ka John Does; kag duha ka police.
Assigned sa Iloilo City Police Office (ICPO) ang duha ka police nga ginkasuhan.
Marso 25 sang gab-i sang naghalin sa Iloilo City si Paloma kag nagdulog sa atubang sang Abe’s Payag Restaurant sa C1 road, Pavia agud kay-uhon ang kadena sang iya biseklita nga naguba mga las-2 sang kaagahon.
Ginpabutyag ni Paloma nga nasal-an siya ni Security Guard Giluani nga kawatan gani gin-hold siya kag gintawgan ang tag-iya sang restaurant.
Gulpi lang may nag-abot nga salakyan suno kay Paloma kag ginpulihan siya kastigo.
Makaligad ang pila ka minutos, nag-abot pa gid ang isa ka salakyan, nagpanaug ang sakay kag nagpuli kastigo kay Paloma.
Nasapwan na lang nga pilason sa talamnan sa Leganes si Paloma kag ginabantayan subong sang police samtang nagapaayo.
