ILOILO — Pilas sa wala nga abaga, wala nga parte sang dughan, wala nga parte sang tiyan, kag wala nga paa ang naagum sang 53-anyos nga lalaki sang gintiro sang riding-in-tandem malapit sa terminal sa Brgy. Bayuyan, Estancia, las-10:35 kahapon sang aga, Mayo 2.
Ginkilala ang biktima kay Jelly Cuacoyco, anay kagawad sang Brgy. Abong, Carles.
Suno kay Police Corporal Victorino Bundac, imbestigador sang Estancia Police Station, samtang nagatambay sa iya ginamaneho nga trucking ang biktima, may nadulog nga motorsiklo sa unhan. Nanaug ang angkas sini, ginpalapitan ang biktima kag gintiro.
Na-recover sa crime scene ang lima ka basiyo sang 45 caliber.
Ginpahayag sang police nga base sa ila pagpangusisa, wala man sang malain nga record ang biktima. Mabuot man ang pagkilala sa iya sang mga residente sang ila barangay kag sang iya amo.
Ginabulong pa sa ospital ang biktima kag ginahibalo pa sang kapulisan ang motibo sa krimen.
