Senior citizen patay sang nahulog sa ginasakyan nga tricycle sa San Enrique, Iloilo
ILOILO — Napatay sa ospital ang 73-anyos nga babaye sang nahulog sa ginasakyan nga tricycle sa Brgy. Quinolpan, San Enrique kahapon sang hapon, May 6.
Ginkilala ang biktima kay Mely Botero, residente sang Brgy. Mapili sang amo man nga banwa.
Suno kay Police Captain Johnny Oro, OIC sang San Enrique Municipal Police Station, pauli na ang biktima upod ang iya utod nga senior citizen man kag ang apo nga menor-de-edad sang gulpiyada nga nagpreno ang tricycle nga ginasakyan tungod nagpreno man ang salakyan nga ginasundan sini.
Nagbunggo ang ulo ni Botero sa handle sang sidewheel suno kay Oro kag nahulog sa tricycle.
Boluntaryo nga nag-surrender ang driver sang tricycle sa San Enrique Municipal Police Station.
