Iloilo City Councilor Plaridel Nava mapasaka sang kaso sa tanan nga involved sa Ungka flyover

Mapasaka sang kaso si Councilor Plaridel Nava kaupod sanday Atty. Shiela Olid kag Atty. Dan Cartagena batuk sa kontraktor nga IBC kag tanan nga taga-DPWH nga involved sa Ungka Flyover.

Suno kay Councilor Nava, wala sang accountability sa kun sin-o ang may deperensya sa Ungka Flyover.

Kun kontraktor ang may deperensya, imbes nga i-award liwat ang kontrata nga nagabalor P250M, dapat bayaran sang kontraktor ang penalties kag damages.

Kun taga-DPWH naman ang may deperensya, dapat magpangatubang sila sang kaso kriminal kag administratibo.

Ginpahayag ni Councilor Nava nga pangunahan niya ang pagpasaka sang kaso tungod daw wala sang may magpangisog.

Nagapanawagan ang konsehal sa mga cause-oriented groups, civil society, religious sector nga maghiwat sang condemnation rally tungod sa “broad daylight robbery” sa pondo sang gobyerno sa pagpa-obra sang Ungka Flyover .

Nagabalor sang P680M ang Ungka Flyover kag nag-gasto pa gid sang P13M sa 3rd party consultant.

Liwat nga magasto ang DPWH sang dugang nga ginabanta P250M para sa pagpakay-o. — via Jeremae Ventar